असोज ४, दोलखा । प्रथम संविधान दिवस २०७३ को अवसरमा दोलखा कारागारमा कैद भुक्तान गरिरहेका ३ कैदीले आम माफी पाएको कारागार कार्यालय दोलखाले जनाएको छ ।
दोलखा कारागारमा विभिन्न मुद्दामा कैद भुक्तान गरिरहेका ७० कैदी मध्ये ३ जनाले संविधान दिवसको अवसरमा असोज ३ सोमबारबाट आममाफी पाएका हुन् । आम माफी पाउनेहरुमा कर्तव्य ज्यान मुद्दाका छिरिङ तमाङ, बहुविवाह मुद्दाका लक्ष्मण घिमिरे र शैलेन्द्र जोशी रहेको दोलखा कारागारका निमित्त जेलर मुकुन्द पन्तले जानकारी दिए । कारागार व्यवस्था विभागको मिति २०७३ असोज २ गतेको, चलानी नं. ३९४ मार्फत प्राप्त पत्रअनुसार बाँकी कैद माफी मिनाहा गरी कैद मुक्त गर्न दिएको आदेश अनुसार ३ कैदी आम माफीमा परेको कार्यालयले जनाएको हो ।
संविधान दिवस, गणतन्त्र दिवस र विजयादशमीको अवसरमा कारागार ऐन २०१९ को विभिन्न संशोधन अनुसार राष्ट्रपतिको कार्यालयले संविधान दिवस २०७३ मा देशभरबाट आम माफीको घोषणा गरेको ५ सय ३७ जनामध्ये दोलखाबाट ३ कैदीले बाँकी कैद मिनाहा हुने गरी आम माफी पाएको दोलखा कारागारले जनाएको हो ।
निमित्त जेलर पन्तका अनुसार तोकिएका १२ प्रकारका मुद्दा बाहेकका कैदीहरुमध्येबाट ४० प्रतिशत कैद भुक्तान गरिसकी असल चालचलन भएका कैदीहरुलाई सिफारिस गरिने प्रावधान रहेको छ ।
