रवीन्द्र गौतम । दोलखा
भदौ २२, दोलखा । जिल्लाको पूर्वी काब्रे गाविसले जिल्लामै पहिलोपटक व्यक्तिगत घटना पञ्जिकरण कार्यलाई पूर्णरुपमा अनलाईन सफ्टवेयरमार्फत सुरु गरेको छ ।
केन्द्रीय पञ्जिकरण विभागद्वारा निर्माण गरिएको अनलाईन सफ्टवेयरमार्फत सेवा सुरु गरिएको जिल्ला विकास समितिको कार्यालय दोलखाले जनाएको छ । जिल्लाको पूर्वी काब्रे गाविसले गत हप्ताबाट व्यक्तिगत घटना दर्तालाई पहिलोपटक अनलाइन सफ्टवेयरमार्फत पञ्जिकरण सुरु गरेको हो । जिल्ला विकास समितिको २२ औं जिल्ला परिषद्बाट जिल्लाका स्थानीय निकायलाई प्रविधिमैत्री बनाउने निर्णयअनुसार अनलाईन सफ्वेयरमार्फत घटना दर्तालाई व्यवस्थित रुपमा सुरु गरिएको पञ्जिकरण शाखाका मधुसुदन आचार्यले जानकारी दिए ।
जिल्लाको स्थानीय निकायलाई प्रविधिमैत्री बनाइने योजना अनुसार पहिलो चरणमा इन्टरनेट सुविधा सहित १६ ओटा गाविसलाई कम्प्युटर उपलब्ध गराए पछि काब्रे गाविसले पहिलोपटक अनलाइन सफ्टवेयरमार्फत पञ्जिकरण सुरु गरेको हो । जन्म, मृत्यु, विवाह, सम्वन्ध विच्छेद र बसाई सराईलाई व्यवस्थित गर्न धेरै सहज बनाएको काब्रे गाविसका सचिव नारायण दाहालले जानकारी दिए ।
उक्त सेवा सुरु भएसँगै सम्पूर्ण व्यक्तिगत घटनाको लगत सफ्टवेयरमार्फत हुने भएको छ । उक्त सेवा सर्वसाधारण जनताहरुले आवश्यक परेको खण्डमा घरमै बसीबसी सम्वन्धित फाराम भरी प्राप्त हुने टोकन नम्बर लिई गाविसको कार्यालयमा गएर आफ्नो घटना दर्ता गराउन सक्ने पञ्जिकरण शाखाका आचार्यले जानकारी दिए । जिल्ला विकास समिति अघिल्लो आर्थिक वर्षबाट सुरु गरेको अनलाईन घटना दर्ता जिल्लाको बाँकी ४७ गाविस र २ नगरपालिकासम्म पु¥याउने लक्ष्य रहेको जनाएको छ ।
