दोलखाको लागि मन्त्रालयगत प्रथम चरणको बजेट सार्वजनिक, रु. १ अर्ब ८९ लाख

रवीन्द्र गौतम । दोलखा

कात्तिक १३, दोलखा । चालु आव २०७३÷०७४ मा दोलखामा खर्च हुने मन्त्रालयगत प्रथम चरणको बजेट सार्वजनिक भएको छ ।

          २०७३ जेठ १५ गते आएको बजेटलाई राष्ट्रिय योजना आयोगले गत असोज ८ गते दोलखाको मन्त्रालयगत बजेट सार्वजनिक गरेको हो । राष्ट्रिय योजना आयोगले सार्वजनिक गरेको १२ मन्त्रालयको प्रथम चरणको बजेटअनुसार दोलखाको बजेट रु. १ अर्ब ८९ लाख ७५ हजार रहेको छ ।

            राष्ट्रिय योजना आयोगले गृह, रक्षा, सामान्य प्रशासन, गरिबी निवारण तथा सहकारी, उर्जा, भूमि सूधार तथा व्यवस्था मन्त्रालय, पशु पंक्षी विकास, सिंचाई, खानेपानी तथा सरसफाई लगायतको मन्त्रालयको बजेट भने सार्वजनिक गरेका छैन ।

              आयोगले सार्वजनिक गरेको दोलखाको चालु आवको बजेटअनुसार कृषि विकास मन्त्रालयबाट चालु र पूँजीगत गरी रु. ६ करोड ४१ लाख ६१ हजार, शिक्षा मन्त्रालयबाट रु. २२ करोड ६२ लाख २६ हजार, स्वास्थ्य तथा जनसंख्या मन्त्रालयबाट रु. १० करोड ५२ लाख ५९ हजार, भौतिक पूर्वाधार तथा यातायात मन्त्रालयबाट रु. ४ करोड ७१ लाख ६३ हजार, युवा तथा खेलकूद मन्त्रालय रु. १८ लाख ४३ हजार, उद्योग मन्त्रालयबाट रु. ५७ लाख ६२ हजार, शहरी विकास मन्त्रालय रु. ७ करोड २९ लाख ८ हजार, संस्कृति, पर्यटन तथा नागरिक उड्डयन मन्त्रालय रु. ६९ लाख १५ हजार, वन तथा भूसंरक्षण मन्त्रालयबाट रु. ३३ लाख ८४ हजार, विज्ञान, प्रविधि तथा वातावरण मन्त्रालयबाट रु. २ करोड ६७ लाख ६४ हजार, महिला, बालबालिका तथा समाजकल्याण मन्त्रालयबाट रु. १ करोड ५६ लाख ५३ हजार, संघीय मामिला तथा स्थानीय विकास मन्त्रालयबाट रु. ४३ करोड २९ लाख ३७ हजार बराबरको प्रथम चरणको बजेट सार्वजनिक गरेको हो ।

दोलखाको जिरीबाट अबैध विस्फोटक पदार्थ सहित भारतीय नागरिक पक्राउ

रवीन्द्र गौतम । दोलखा

कात्तिक १२, दोलखा । पूर्वी दोलखाको जिरीबाट अबैध विस्फोटक पदार्थ सहित भारतीय नागरिक पक्राउ परेका छन् । पक्राउ पर्नेमा भारतको अँधेरी–१४, शिवहरी गाउँका २४ वर्षिय रमेश जैशवाललाई अबैध विष्फोटक पदार्थ सहित विहिबार इलाका प्रहरी कार्यालय जिरीले पक्राउ गरेको हो ।

          नजिकिँदो तिहारलाई लक्षित गरी भारतबाट जिरीमा पु¥याइ लुकाई छिपाई विक्रीमा राखिएको अवस्थामा जैशवालको साथबाट करिब ३ केजी विष्फोटक पदार्थ बरामद गरिएको प्रहरीले जनाएको छ । प्रहरीले विहिबार साँझ कस्मेटिक पसलबाट विक्री गर्दै गरेको अवस्थामा जैशवाललाई पटाका सहित नियन्त्रणमा लिएको जनाएको छ । जैशवालको साथबाट रकेट पटका १० थान, नागिन पटाका ३ प्याकेट, आलुबम ३५ थान, राधेचक्का ८ पिस र फुलझरी ३ थान बरामद गरेको इलाका प्रहरी कार्यालय जिरीका प्रहरी निरीक्षक राजेशकुमार कार्कीले जानकारी दिए ।

              पक्राउ परेको जैशवाललाई इलाका प्रहरी कार्यालय जिरीमा राखेर थप अनुसन्धान गरी रहेको छ भने बरामद गरेको पटाकाहरु शुक्रबार दिउँसो स्थानीयको रोहवरमा नष्ट गरिएको जिरीका प्रहरी निरीक्षक कार्कीले जानकारी दिए । यस अघि जिल्ला प्रहरी कार्यालय दोलखाले गम्भीर दुर्घटना हुन सक्ने भन्दै स्थानीय सञ्चार माध्यमबाट पटाकाजन्य पदार्थ विक्री र पड्काउन रोक लगाएको थियो ।

रेडक्रस दोलखाले वितरण गरेको सोलार गुणस्तरहीन, पीडितहरु आक्रोशित

रवीन्द्र गौतम । दोलखा

कात्तिक १०, दोलखा । नेपाल रेडक्रस सोसाइटी दोलखाले जिल्लाका १८ गाविसका भुकम्पपीडितहरुलाई वितरण गरेको सौर्य टुकी गुणस्तरहीन पाइए पछि पीडितहरु आक्रोशित भएका छन् ।

       वैकल्पीक उर्जा प्रवर्दन केन्द्रले अनुदानमा उपलब्ध गराएको १८ हजार सौर्य टुकीमध्ये १० गाविसमा वितरण गरिएको करिब १० हजार सौर्य टुकीमध्ये करिब २ हजार थान गुणस्तरहीन पाइए पछि पीडितहरु आक्रोशित भएका हुन् । वितरित सौर्य टुकीको व्याट्री चार्ज नहुने र प्यानल समेत फुटेको अवस्थामै वितरण गरिए पछि भुकम्पपीडितहरु रेडक्रसप्रति झन आक्राशित भएका हुन् । इलेक्ट्रोनिक्स व्यवसायीहरुका अनुसार ड्यामेज व्याट्री जवरजस्ती चार्ज गर्न खोजे गम्भीर दुर्घटना समेत हुन सक्ने भएकोले पीडितहरुलाई सजग रहन समेत आग्रह गरेका छन् ।

             रेडक्रस दोलखालाई उत्तरी दोलखाको १८ गाविसमा सौर्य टुकी र सुधारिएको चुल्हो वितरण गर्न वैकल्पीक उर्जा प्रवर्दन केन्द्रले जिम्मा दिएको थियो । रेडक्रस दोलखा सम्वन्धी विभिन्न विषयको भ्रष्टाचारको विषयमा छानवीन चलिरहेको बेला वितरण गरिएको सौर्य टुकी समेत गुणस्तरहीन पाइए पछि पीडितहरु झन मारमा परेका छन् । चंखु, मार्बु, खारे, मिर्गे, चिलंखा लगाएतको गाविसबाट गुणस्तरहीन सौर्य टुकी पाइए पछि फिर्ता गर्नको लागि रेडक्रस दोलखासँग सम्पर्क गरिसकेको पीडितहरुले जनाएको छन् ।

            वैकल्पीक उर्जा प्रवर्दन केन्द्रले गत भदौ महिनाभित्र वितरण गर्ने गरी उपलब्ध गराएको सौर्य टुकी रेडक्रस दोलखाको आन्तरिक कलह र विभिन्न भ्रष्टाचारमा मुछिएको कारण वितरण गर्न सकेको थिएन । अव्यवस्थित भण्डारण र ढुवानी टेण्डर समेत कसैले दाखिला नगरे पछि आन्तरिक रुपमा ढुवानी गर्ने व्यवस्था मिलाइएको एक सदस्यले जानकारी दिए ।

              दोलखाको मार्बु, चंखु, खारे, लामाबगर, गौरीशंकर, लापिलाङ, मिर्गे, लादुक, ओराङ, झ्याँकु, बाबरे, चिलंखा, बिगु, आलम्पु, सुरी, खोपाचागु, बुलुङ, जुँगु गाविसमा सौर्य टुकी र सुधारिएको चुल्हो वितरण गर्ने कार्यक्रम रहेको छ । नेपाल रेडक्रस सोसाइटी दोलखाका कार्यक्रम संयोजक मधुसुदन थापाले भदौमा आएको सामान भएकोले नचलाइ राखेपछि ड्यामेज भएको स्वीकार गरेका छन् । कार्यक्रम संयोजक थापाले ‘जे जस्तो अवस्थामा छ सोही अवस्थामा वितरण नगरि नहुने भएकोले त्यस्तो वितरण गरिएको’ जानकारी दिए । 

             जिल्ला उर्जा तथा वातावरण शााखाले जिल्ला दैवी प्रकोप उद्धार समिति दोलखाको बैठकमा समेत रेडक्रसले सौर्य टुकी वितरण गर्न ढिलाई गरेको विषयमा जानकारी गराएको थियो । सुनुवाई हुन नसकेको कारण पीडितहरुले उज्यालोको नाममा गुणस्तरहीन सौर्य टुकी बुझ्न बाध्य भएको प्रति सरोकारवालाहरु आँखा चिम्लिएर बसेका छन् ।

दोलखाको लाकुरीडाँडा गाविसबाट मात्रै ५ करोडको बन्दाकोभी निर्यात

रवीन्द्र गौतम । दोलखा

कात्तिक १०, दोलखा । दोलखाको पश्चिमी एक गाविसबाट मात्र रु. ५ करोड बराबरको बन्दाकोभी निर्यात भएको पाइएको छ ।

           जिल्लाको पश्चिमी लाकुरीडाँडा गाविसबाट मात्र पछिल्लो ६ महिनामा रु. ५ करोड बराबरको बन्दाकोभी निर्यात भएको पाइएको हो । अर्गानिक तरकारी र आलु उत्पादनमा ख्याती कमाएको लाकुरीडाँडा गाविसबाट मात्र चालु मौषमको ६ महिनामा सो बराबरको बन्दाकोभी निर्यात भएको किसानहरुले जनाएका छन् ।

        लाकुरीडाँडा–७, ८ र ९ तथा अन्य वडाका करिब २ सय किसानहरुले दैनिक करिब १ सय २० टन बन्दाकोभी निर्यात गर्नेे गरेको लाकुरीडाँडा–९, झिँगानेका किसान धनबहादुर लामाले जानकारी दिए । किसान लामाका अनुसार सडकमा पु¥याइएको बन्दाकोभी पछिल्लो ६ महिना यता रु. २५ मा विक्री गरिरहेका छन् । लाकुरीडाँडा गाविसको झिँगाने, हलहले, खरिढुङ्गा लगायतको क्षेत्रबाट दैनिक करिब रु. ३ लाख बराबरको बन्दाकोभी राजधानी कालिकाटी तरकारी बजार लगायतका स्थानहरुमा निर्यात हुने गरेको किसानहरु बताउँछन् । सदरमुकाम चरिकोट, मैनापोखरी, जिरी, सिंगटी, मागादेउराली लगायतको स्थानीय बजारहरुमा पनि लाकुरीडाँडाको बन्दाकोभी विक्री हुने गरेको किसानहरु बताउँछन् ।

         केही वर्षसम्म बन्दाकोभीले बजार भाउ नपाएपछि आत्तिएका किसानहरुले मेहनत गरे पछि चालु आवमा मनग्ये आम्दानी लिन पाएको लाकुरीडाँडा–७ कि किसान सोममाया श्रेष्ठले बताइन् । ‘अघिल्लो सिजनमा निकै सस्तोमा विक्री गर्न बाध्य हामीले पोहोरको घाटा समेत उठायौं ।’ किसान श्रेष्ठले बताइन् । लाकुरीडाँडा गाविसका विभिन्न क्षेत्रका करिब ५ हजार रोपनीमा बन्दाकोभी खेती हुने गरेको किसानहरुको अनुमान रहेको छ । बन्दाकोभी विशेषगरी नेपाली बजारमा तरकारी, मम, चाउमिन, बर्गर, अचार लगायतमा प्रयोग हुने गरेको होटल व्यवसायीहरु बताउँछन् ।

          कृषि विकास कार्यालय दोलखाले अर्गानिक तरकारी उत्पादनको पकेट क्षेत्रको रुपमा समेत विकास गरे पछि अघिल्लो आवमा ठूलो मात्रामा आलु समेत निर्यात भएको कार्यालयको तथ्याङ्क रहेको छ । जिल्ला कृषि विकास कार्यालय दोलखाका योजना अधिकृत नेत्रमणी काफ्लेले यस सिजनमा लाकुरीडाँडा क्षेत्रबाट करिब २० हजार टन बन्दाकोभी निर्यात हुन सक्ने जानकारी दिए ।

कानुन विपरित सञ्चालित दोलखाका ३ फार्मेसी बन्द

रवीन्द्र गौतम । दोलखा

कात्तिक ७, दोलखा । नेपालको प्रचलित ऐन विपरित सञ्चालनमा रहेको दोलखाको ३ फार्मेसी (औषधि पसल) बन्द गरिएको छ ।

   औषधी व्यवस्थापन विभाग, विजुलीबजार काठमाण्डौंले नियमित अनुगमनको क्रममा ऐन तथा कानुन विपरित सञ्चालित सदरमुकाम चरिकोट, दोलखा बजार र मैनापोखरी गरी ३ स्थानका ३ ओटा फार्मेसी जिल्ला प्रशासन कार्यालय दोलखामार्फत बन्द गराएको हो ।

           सदरमुकाम चरिकोटको पशुपति डाँडास्थित राजाराम खनालको औषधी पसल, भीमेश्वर नगरपालिका–३, स्थित गौरीशंकर जनरल अस्पतालमा खोलिएको सुमित कुमार श्रेष्ठको औषधी पसल र काब्रे–३, मैनापोखरीस्थित प्रेमबहादुर बस्नेतको औषधी पसल बन्द गरिएको जिल्ला प्रशासन कार्यालयले जनाएको छ ।

           औषधी ऐन २०३५ को दफा १० बमोजिम विपरित हुने गरी सञ्चानमा रहेको भनि औषधी व्यवस्थापन विभागको सिफारिसको आधारमा जिल्ला प्रशासन कार्यालय दोलखाको कात्तिक ५ गतेको निर्णयअनुसार बन्द गरिएको जनाइएको छ । जिल्ला स्वास्थ्य कार्यालय दोलखाका ल्याव टेक्निसियन अधिकृत राजन पोखरेलले कार्यालयलाई त्यस्तो कुनै जानकारी नआएको जनाउँदै अधिकार क्षेत्र नभएकोले जानकारी नदिएको पनि हुन सक्ने अनुमान गरे ।

विना जानकारी दोलखाली आकाशमा उडेको हेलिकप्टरलाई स्थानीय प्रशासनद्वारा खानतलाशी

रवीन्द्र गौतम । दोलखा

असोज २१, दोलखा । स्थानीय प्रशासनलाई विना जानकारी सदरमुकाम चरिकोटमा आकस्मिक अवतरण गरिएको हेलिकप्टरलाई स्थानीय प्रशासनले खानतलासी गरेको छ ।

काठमाण्डौंबाट सिमिगाउँको लागि उडेको ९एन एअर डाइनेस्टीको हेलिकप्टर विना सूचना छिमेकी चीनको सिमावर्ती क्षेत्रतर्फ उडेको कारण आशंका लागि प्रमुख जिल्ला अधिकारी पुष्पराज शाहीको निर्देशनमा सदरमुकाम चरिकोटमा अवतरण गराई खानतलासी गरिएको प्रहरीले जनाएको छ । खानतलासीको क्रममा कुनै पनि शंकास्पद बस्तु नभेटिएको समेत प्रहरीले जनाएको छ । एअर डाइनेस्टीको कर्पोरेटबाट लिखित रुपमा चेक रिपब्लिकको नागरिकलाई सिमीगाउँबाट रेस्क्युको लागि उडान भरेको जनाए पनि स्थानीय प्रशासनले अर्को उडानको लागि अनुमति दिएको प्रहरीले जनाएको छ ।