असोज ४, दोलखा । दोलखाको पूर्वी जुँगु गाविस वडा नं. ३ मा चट्याङ लागेर एक जनाको मृत्यु भएको छ भने, एक गम्भिर सहित १० जना घाइते भएको छ ।
जुँगु–३, हस्पिटल डाँडामा छिमेकीको लाशको सद्गद् गर्दै गरेका मलामीहरुमध्ये जुँगँु गाविस वडा नं. ३ का करिब ३५ वर्षिय मानबहादुर कार्कीको चट्याङ लागेर मृत्यु भएको जुँगुँबाट स्थानीय प्रत्यक्षदर्शी प्रदिप केसीले जानकारी दिए ।
प्रत्यक्षदर्शी केसीका अनुसार जस्तापाताको छानामा बसिरहेका कार्कीको टाउको र जिउ जलेको अवस्था रहेको छ । स्थानीयका अनुसार चट्याङ दिउँसो करिब २ बजे परेको थियो ।
चट्याङ लागि जुँगु गाविस वडा नं. १ का तुलबहादुर जिरेलको अवस्था गम्भिर रहेको छ भने, अन्य गणेश जिरेल, पदम जिरेल, टिका केसी, सोमबहादुर बस्नेत, बद्री खड्का, रामकुमार जिरेल, दिलमाया जिरेल, जुनकिरी जिरेल, अमृत लामा र कुमार जिरेल घाइते भएको प्रत्यक्षदर्शी केसीले जानकारी दिनुभयो । घटनास्थल छेउमै रहेको जुँगु स्वास्थ्य चौकीमा प्रारम्भिक उपचार समेत गर्ने सामग्रीहरु नभए पछि घाइतेहरुलाई उपचारको लागि सदरमुकाम चरिकोट तर्फ ल्याइँदै गरेको स्थानीयहरुले जनाएका छन् । घटनास्थलतर्फ मैनापोखरी प्रहरी जाँदै गरेको जिल्ला प्रहरी कार्यालय दोलखाले जनाएको छ ।
