दोलखावासीले पाउने माथिल्लो तामाकोशीको शेयर फागुनमा आउँदै

रवीन्द्र गौतम । दोलखा

मंसिर १४, दोलखा । विभिन्न अबरोधको कारण २ पटकसम्म सरेको माथिल्लो तामाकोसी जलविद्युत आयोजनाले दोलखावासीबाट संकलन गर्ने भनेको शेयर फागुनसम्म जारी गर्ने भएको छ ।

              वातावरणीय प्रभाव मूल्याङ्कन प्रतिवेदनअनुसार आयोजना प्रभावित दोलखावासीबाट संकलन गरिने १० प्रतिशत शेयर आयोजनाले चालु आवको फागुनसम्ममा जारी गर्ने भएको हो ।

दोलखामा २ सय ५१ किमी प्रसारण लाइन निर्माण हुँदै

रवीन्द्र गौतम । दोलखा

मंसिर ९, दोलखा । जलविद्युतको राजधानी भनेर चर्चा कमाउँदै आइरहेको दोलखामा २ सय ५१ किलोमिटर प्रशारण लाइन निर्माण हुने भएको छ ।

            निर्माणाधिन र निर्माण सम्पन्न गरेर नियमित विद्युत उत्पादन गरिरहेका दोलखाका १८ जलविद्युत आयोजनाहरुद्धारा विद्युत प्रसारणको लागि २ सय ५१ किलोमिटर प्रसारण लाइन निर्माण गर्ने भएका हुन् । ३३ केभीदेखि ४ सय केभी क्षमताको प्रसारण लाइन दोलखामा निर्माण हुने विद्युत विकास विभागका सूचना अधिकारी बाबुराजा अधिकारीले जानकारी दिए ।

              विद्युत विकास विभागले निर्माण लाइसेन्स प्रदान गरेको ४ ओटा प्रसारण लाइन योजनामध्ये माथिल्लो तामाकोशी जलविद्युत आयोजनाले निर्माण गरिरहेको २२०/१३२ केभी क्षमताको ४७ किलोमिटर लामो प्रसारण लाइनको निर्माण करीब ६६ प्रतिशत सम्पन्न

बार्षिक साढे ३ हजार दोलखाली वैदेशिक रोजगारमा

रवीन्द्र गौतम । दोलखा

मंसिर ५, दोलखा । पहाडी दोलखा जिल्लाबाट बार्षिक करिब साढे ३ हजार दोलखाली खाडी लगायत विभिन्न तेस्रो मुलुकमा वैदेशिक रोजगारमा जाने गरेको पाइएको छ ।

         वैदेशिक रोजगार विभागको प्रतिवेदनअनुसार दोलखाबाट खाडी लगायत विभिन्न तेस्रो मुलुकमा वैदेशिक रोजगारमा जाने महिला तथा पुरुषहरुको संख्या ३ हजार २ सय ११ पाइएको हो । प्रतिवेदनअनुसार आर्थिक वर्ष २०७२÷०७३ मा जिल्लाबाट वैदेशिक रोजगारमा जाने महिला तथा पुरुषहरुको संख्या १ दशमलब ७२ प्रतिशत रहेको पाइएको हो । विभागले भारत र भारतहुँदै खाडी लगायत तेस्रो मुलुकमा जानेहरुको तथ्याङ्क समावेश नगरेको जनाएको छ ।

          जिल्लाको कूल जनसंख्या १ लाख ८६ हजार ५ सय ५७ मध्ये ३ हजार २ सय ११ जना विभिन्न २० गन्तव्यमा रोजगारीका लागि गएको विभागको तथ्याङ्कमा उल्लेख गरिएको छ । आव २०७२÷०७३ मा महिला ४ सय ७७ र पुरुष २ हजार ७ सय ३४ रहेको छ । रोजगारीका लागि विदेशिनेमध्ये सबैभन्दा बढि साउदी अरेवियाण्मा ९ सय २८ रहेका छन् भने सबैभन्दा कम कंगो, पोर्चुगल, अल्जेरिया र अफगानिस्तानमा एक÷एक जना गएको तथ्याङ्क छ ।

            खाडी मुलुकको संयुक्त अरब इमिरेट्स, कुवेत, बहराइन, कतार, ओमन र साउदी अरेविया बाहेक विकसित देशहरुको रोजगारीमा समेत दोलखाली पुगेको तथ्याङ्क छ । साइप्रस, जापान, जोर्डन, मकाउ, पोल्याण्ड, हङकङ, चेक रिपब्लिकजस्ता विकसित देशहरुमा पनि दोलखालीहरु रोजगारीमा पुगेको विभागको तथ्याङ्कले देखाएको छ । दोलखालीहरु रोजगारीका लागि द्वन्द्वग्रस्त देश अफगानिस्तान, कंगो जस्ता देशहरु समेतमा पुगेको विभागको तथ्याङ्क रहेको छ ।

विभागको तथ्याङ्कअनुसार बैदेशिक रोजगारीमा संयुक्त अरब इमिरेट्स (युएई)मा सबैभन्दा बढि महिला २ सय २५ जना गएको देखिएको छ भने मलेसियामा ३६, कुवेतमा १५, कतारमा २१, साइप्रसमा ५७, टर्कीमा १०, जोर्डनमा ५१, साउदी अरेवियामा ४७, मकाउ तथा चेक रिपब्लिका २÷२ र रोमानियामा १ जना गत आवमा गएको विभागको तथ्याङ्कले देखाएको छ ।

            बैदेशिक रोजगारमा गएकाहरुबाट दोलखामा मासिक रु. २० करोड रेमिट्यान्स भित्रिने गरेको तथ्याङ्क छ । सबैभन्दा बढी रेमिट्यान्स मलेसिया, साउदी अरब, दुबई र कतारबाट भित्रिने गरेको सम्वद्ध व्यवसायीहरु बताउँछन ।

             जिल्ला प्रशासन कार्यालय दोलखाको अनुसार दैनिक करिब २२ ले राहदानीको आवेदन दिने गरेका छन् भने बार्षिक करिब ८ हजार राहदानी जारी गर्ने गरेको छ । प्रशासन कार्यालयको तथ्याङ्कअनुसार साउनदेखि कात्तिकसम्म करिब २ हजारले राहदानी बुझिसकेका छन् । त्यस्तै द्रुत राहदानी प्राप्तिको लागि करिब १ हजार ५ सयले सिफारिस लिएको राहदानी जिल्ला प्रशासन कार्यालय दोलखाले जनाएको छ । सरकारले युवाहरुलाई व्यवसायिक कृषि खेती लगायतका लागि अनुदान दिने भनिएता पनि दैनिक करिब २२ युवाहरु वैदेशिक रोजगारीमा जान राहदानीको लाममा बसेका पाइन्छन् ।

दोलखा जिविसको बेरुजु रु. १२ करोड ३० लाख

सबैभन्दा बढि इन्धन, प्रविधि, छपाई, मर्मत, भ्रमण भक्तामा बेरुजु

रवीन्द्र गौतम । दोलखा

मंसिर २, दोलखा । महालेखा परीक्षकको कार्यालय काठमाण्डौंले सार्वजनिक गरेको आर्थिक वर्ष २०७१÷०७२ सम्म जिल्ला विकास समिति दोलखाको बेरुजु रु. १२ करोड ३० लाख पुगेको छ ।

        केही समय अघि महालेखा परीक्षकको कार्यालय काठमाण्डौंले सार्वजनिक गरेको तथ्याङ्कअनुसार रु. ९१ करोडको लेखापरीक्षण गर्दा बेरुजु रु. १२ करोड ३० लाख ५ हजार पुगेको हो । जिविस दोलखाको बेरुजु कूल लेखापरीक्षण रकमको १३ दशमलब ५० प्रतिशत देखिएको महालेखा परीक्षकको कार्यालय काठमाण्डौले जनाएको छ ।

               जिविस दोलखाको हालसम्मको बेरुजु रकम चालु आबको दोलखाको ४ ओटा सरकारी कार्यालयको कूल बार्षिक बजेट बराबर रहेको कोष तथा लेखा नियन्त्रक कार्यालय दोलखाले जनाएको छ । जिविस दोलखाले आव २०७२÷०७३ मा कूल बजेटको ७० दशमलब १२ प्रतिशत बजेट समेत फ्रिज पठाएको थियो । जिविस दोलखाको गत आबको मात्र बेरुजु रु. १ करोड ५६ लाख ४६ हजार रहेको महालेखापरिक्षकको कार्यालयका प्रवक्ता बाबुराम गौतमले जानकारी दिए ।

                बेरुजु रकमहरुमा सबैभन्दा बढि इन्धन, प्रविधि, छपाई, मर्मत, भ्रमण भक्ता लगायतको रहेको महालेखाले जनाएको छ । योजना बाहेक, सरकारी अनुदान, आन्तरिक स्रोत, राजश्व, धरौटी र अन्य शीर्षकमा समेत बेरुजु देखिएको छ । दोलखाका स्थानीय विकास अधिकारी शंकर नेपालले उल्लेखनीय मात्रामा बेरुजु घटाउने अभियानको लागि बेरुजु फछर्योट सम्वन्धी तालिका निर्माण भईरहेको बताए ।

दोलखामा ‘रेड किवी’को परीक्षण सफल

रवीन्द्र गौतम । दोलखा

मंसिर २, दोलखा । औषधीय गुण र अफ सिजनमा फल पाक्ने विशेषताले भरिएको फल ‘रेड किवी’को परीक्षण दोलखामा सफल भएको छ ।

  आर्थिक वर्ष २०७१÷०७२ देखि दोलखाको बोच गाविसस्थित शितोष्ण फलफूल रुटस्टक विकास केन्द्रले सुरु गरेको ‘रेड किवी’को परीक्षण उत्पादन सफल भएको हो । नार्कका बरिष्ठ बैज्ञानिक डा. सूर्य पाण्डेले काब्रेपलाञ्चोक जिल्लाको पातलेखेतमा गरिरहेको खेतीबाट ५० बोटबाट विरुवा ल्याएर गरिएको परीक्षण उत्पादन सफल भएको शितोष्ण फलफूल रुटस्टक विकास केन्द, बोचका कृषि प्राविधिक गुणराज पौडेलले जानकारी दिए ।

सामान्य किवीभन्दा २ महिना अघिनै खान योग्य हुने ‘रेड किवी’लाई दोलखाको १ हजार २ सयदेखि १ हजार ७ सय मिटरको उचाईसम्म खेती गर्न सकिने परीक्षणबाट देखिएको कृषि प्राविधिक पौडेलले जानकारी दिए । अरु किवीभन्दा सानो, छिटो पाक्ने, असाध्यै स्वादिलो र असोजमै पाक्ने ‘रेड किवी’ रोपेको तेस्रो वर्षबाट उत्पादन दिने परीक्षणले देखाएको छ ।

५–५ फिटको फरकमा ३–३–३ फिट लम्बाई, चौडाई र गहिरो बनाएर एक रोपनी जमिनमा १५ ओटा पोथी र ३ ओटा भाले जातको विरुवा रोप्न सकिने प्राविधिकहरुको अनुभव रहेको छ । करिब ४० वर्षसम्म उत्पादन दिने ‘रेड किवी’को प्रत्येक बोटमा ३० देखि ५० केजी फल फल्ने कृषि प्राविधिक पौडेलले जानकारी दिए ।

दोलखाको बिरुवाबाट जाली नेपाली नोटसहित एकजना पक्राउ

रवीन्द्र गौतम । दोलखा

कात्तिक ३०, दोलखा । जाली नेपाली नोटसहित दोलखाको बिरुवाबाट एकजनालाई प्रहरीले पक्राउ गरेको छ ।

    मंगलबार बिहान भीमेश्वर नगरपालिका–८, बिरुवास्थित किरातेश्वर पेट्रोल पम्पबाट किरातीछाप प्रहरीको गस्ती टोलीले मेलुङ गाविस वडा नं. ४, दोलखा निवासी कुमार नेपालीलाई जाली नोटसहित पक्राउ गरेको हो । पक्राउ परेका नेपालीको साथबाट हजार दरका २ थान नेपाली जाली नोट बरामद गरेको प्रहरीले जनाएको छ ।

     

पक्राउ परेका नेपालीको साथबाट ग६ १५१२३० र घ३७ ६८३०४९ नम्बरको जाली हजारको नोट बरामद गरेको प्रहरीले जनाएको छ । किरातीछाप प्रहरीले नेपालीलाई थप अनुसन्धानको लागि जिल्ला प्रहरी कार्यालयमा बुझाएको बुझिएको छ ।

दोलखामा ‘एक विद्यार्थी पढाऊ अभियान’अन्र्तगत २ जनालाई छात्रवृत्ति प्रदान

रवीन्द्र गौतम । दोलखा

कात्तिक २९, दोलखा । सदरमुकाम चरिकोटस्थित गौरीशंकर बहुमुखी क्याम्पसले सुरु गरेको एक विद्यार्थी पढाऊ अभियानअन्र्तगत आज सोमबार एक कार्यक्रम वीच २ जनालाई छात्रवृत्ति प्रदान गरिएको छ ।

       गरीब, विपन्न, अतिपिछडिएको तथा सिमान्तकृत परिवारबाट उच्च शिक्षा हासिल गर्न क्याम्पसमा भर्ना भएकाहरुमध्येबाट क्याम्पस व्यवस्थापन समितिको सिफारिसमा छात्रवृत्ति प्रदान गरिएको हो ।

          छात्रवृत्ति प्राप्त गर्नेमा भीमेश्वर नगरपालिका–६ निवासी व्यवस्थापन संकायको १२ कक्षामा अध्ययनरत छात्रा सरु श्रेष्ठ र ओराङ गाविस निवासी शिक्षा संकायको १२ कक्षामा अध्ययनरत मोहन तमाङलाई जनही ७ हजार ५ सयको दरले छात्रवृत्ति प्रदान गरिएको क्याम्पस व्यवस्थापन समितिका अध्यक्ष राजेन्द्र मानन्धरले जानकारी दिए । नाम्दु–१ जन्मथलो भएर राजधानी काठमाण्डौंमा बौद्धिक अपाङ्गता भएका मानिसहरु बारे काम गर्दै आएकी सोविता उप्रेतीले सोमबार एक कार्यक्रम विच सो राशीको छात्रवृत्ति प्रदान गरेकी हुन् ।

          क्याम्पस व्यवस्थापन समितिका अध्यक्ष राजेन्द्र मानन्धरको अध्यक्षतामा आयोजित कार्यक्रममा प्रमुख अतिथि एवम् दोलखा उद्योग बाणिज्य संघका अध्यक्ष सुन्दर कार्कीले क्याम्पसमा प्राविधिक विषयलाई समेत अध्यापन सुरु गर्नु पर्ने र त्यसको लागि सम्पूर्ण व्यवसायीको साथ रहने प्रतिवद्धता व्यक्त गरे ।

दोलखामा एकादशीको फूल तार्न गएका एकजनालाई कोशीले बगायो

स्थानीय सहित रामेछाप र दोलखाका प्रहरीद्वारा खोजी जारी

रवीन्द्र गौतम । दोलखा

कात्तिक २५, दोलखा । दक्षिणी दोलखाको भेड्पु गाविसमा पर्ने तामाकोशीमा एकादशीको फूल तार्न गएका एकजनालाई कोशीले बगाउँदा बेपत्ता भएका छन् ।

भेड्पु–२, बगुवाबेंशी क्षेत्रमा पर्ने तामाकोशीमा एकादशीको फूल तार्न गएका भेड्पु–२, बाबियोखर्क निवासी वर्ष ४७ का बद्रीविक्रम भण्डारीलाई बिहिबार बिहान करिब ११ बजे तामाकोशीले बगाएको जिल्ला प्रहरी कार्यालय दोलखाले जनाएको छ । स्थानीयलाई उददृत गर्दै जिल्ला प्रहरी कार्यालय दोलखाका प्रहरी निरीक्षक विनोद सुनुवारले बाबियोको डोरीलाई कोशीपारी पु¥याउन पौडिने क्रममा भण्डारीलाई बगाएको जनाएका छन् । कोशीले बगाएका भण्डारीलाई स्थानीयहरु सहित दोलखाका प्रहरीले रामेछापको प्रहरीसँग समन्वय गरेर खोजी कार्य अघि बढाएको प्रहरी निरीक्षक सुनुवारले जानकारी दिए ।

प्रधानमन्त्री दाहालद्वारा माथिल्लो तामाकोशी जलविद्युत् आयोजनाको स्थलगत निरीक्षण, निर्धारित समयभन्दा अघि निर्माण सके सरकारद्वारा पुरस्कारको घोषणा

रवीन्द्र गौतम । दोलखा

कात्तिक २३, दोलखा । प्रधानमन्त्री पुष्पकमल दाहालले माथिल्लो तामाकोशी जलविद्युत् आयोजनाको काम समयमै सम्पन्न गर्न निर्देशन दिएका छन् ।

               दोलखाको लामाबगर गाविसमा निर्माणाधिन आयोजनाको निरीक्षण गर्न आज मंगरबार लामाबगर आएका प्रधानमन्त्री दाहालले आयोजनाको काम निर्धारित समयमै सक्न निर्देशन दिएका हुन् । २०७२ सालको आमविनासकारी भुकम्प र त्यसको पराकम्प तथा भारतीय नाकाबन्दीले थिलथिलो बनेको आयोजनाले गति लिन सुरु गरेसँगै प्रधानमन्त्री दाहालले चासो सहित निरीक्षण गरेका हुन् ।

              आयोजनाको स्थलगत निरीक्षणपछि आयोजित पत्रकार सम्मेलनमा प्रधानमन्त्री दाहालले निर्धारित समयमै काम सम्पन्न गरे कर्मचारी र ठेकेदारलाई सरकारद्वारा पुरस्कार दिने घोषणा समेत गरे । सरकारद्वारा आयोजनामा लगानी गरिएको साढे ११ अर्ब ऋणलाई अतिविपन्न परिवार, सहिद तथा बेपत्ता परिवारलाई सेयरको रुपमा रुपान्तरण गर्न गृह कार्य गरि रहेको प्रधानमन्त्री दाहालले खुलासा गरे । नेपाल विद्युत प्राधिकरणका कार्यकारी प्रमुख कुलमान घिसिङ सम्मिलित छलफलमा ८७ मेगावाट क्षमताको तामाकोशी–५ र २५ मेगावाट रोल्वालिङ डाइभर्सन तत्काल सुरु गर्न निर्देशन दिँदै सरकारको आवश्यक सहयोग हुने प्रतिवद्धता समेत दोहो¥याए ।

            निरीक्षण भ्रमण रहेका भौतिक पूर्वाधार तथा यातायात मन्त्रालयका सचिव धनबहादुर तमाङले प्रस्ताव गरेको दोलखाको लामाबगरदेखि तिब्बतको फलाक जोड्ने सडक निर्माण सुरु गर्न मन्त्री परिषद्को निर्णय आवश्यक परेको जिकिरमा प्रधानमन्त्री दाहालले सरकारले यथासक्य सहयोग गर्ने प्रतिबद्धता व्यक्त गरे । उनले माथिल्लो तामाकोशी जलविद्युत् आयोजनाको भूमिगत विद्युत गृह, मुख्य सुरुङहरु र बाँधस्थलको निरीक्षण गरे ।

            राष्ट्रिय गौरवको स्वदेशी पूँजीमा लामाबगर गाविसमा निर्माणाधीन ४ सय ५६ मेगावाट क्षमताको माथिल्लो तामाकोशी जलविद्युत् आयोजना निर्माणको काम ८२ प्रतिशत सम्पन्न भएको छ । आयोजना सम्पन्न गर्न ३५ अर्ब २९ करोड लाग्ने प्रारम्भिक अनुमान गरिएको भए पनि विभिन्न कारणले लागत बढेर ४१ अर्ब ७२ करोड पुग्ने अनुमान गरिएको छ ।

माथिल्लो तामाकोशी जलविद्युत् आयोजनाको निर्माण कार्य ८२ प्रतिशत सम्पन्न

रवीन्द्र गौतम । दोलखा

कात्तिक २२, दोलखा । राष्ट्रिय गौरवको स्वदेशी पूँजीमा दोलखाको लामाबगर गाविसमा निर्माणाधिन ४ सय ५६ मेगावाट क्षमताको माथिल्लो तामाकोशी जलविद्युत् आयोजनाको निर्माण कार्य ८२ प्रतिशत सम्पन्न भएको छ ।

    २०६८ सालबाट निर्माण सुरु भएको आयोजना २०७४ असारसम्म निर्माण सम्पन्न हुनु पर्नेमा २०७२ सालको आम विनासकारी भुकम्प, निरन्तरको पराकम्प र भारतीय नाकावन्दीले प्रतिकूल असर गरेको आयोजनाले कार्यप्रगति प्रतिवेदनअनुसार ८१ दशमलब ९० प्रतिशत निर्माण कार्य सम्पन्न गरेको हो । विभिन्न ४ लट गरी निर्माण सुरु गरेको आयोजनाको ८२ प्रतिशत लक्ष्य हासिल गर्दा कूल रु. ३१ अर्ब ८४ करोड खर्च भएको माथिल्लो तामाकोशी जलविद्युत् आयोजनाका वातावरण विभाग प्रमुख एवम् प्रवक्ता डा. गणेश न्यौपानेले जानकारी दिए । आयोजना निर्माणको लागि रु. ३५ अर्ब २९ करोड बजेट विनियोजन गरिएको भए पनि विभिन्न कारणले लागत बढेर रु. ४१ अर्ब ७२ करोड पुग्ने अनुमान गरिएको छ ।

    आयोजनामा लट–१ को मुख्य ठेकेदार चिनियाँ कम्पनी सिनो हाइड्रोले सिभिल निर्माण कार्य करिब ८५ प्रतिशत सम्पन्न गरेको आयोजनाका प्रवक्ता डा. न्यौपानेले जानकारी दिए । प्रवक्ता न्यौपानेकाअनुसार सिभिल निर्माण कार्य अन्र्तगतको बाँध निर्माण ८५ प्रतिशत, मुख्य सुरुङ ८१ प्रतिशत,  टेलरेस सुरुङ शतप्रतिशत, अडिट लगायत अन्य सुरुङ ९९ प्रतिशत, भूमिगत विद्युतगृह तथा ट्रान्सफर्मर क्याभर्न कंक्रिट कार्य ८८ प्रतिशत कार्य पुरा भएको छ ।

           लट–२ को इलेक्ट्रोमेकानिकलले पनि बाँधस्थलमा गेट हबसम्वन्धी कार्यहरु करिब ५५ प्रतिशत पुरा भएको छ भने पावर हाउसमा ट्रान्सफर्मरको पाइपीङ कार्यहरु अन्तिम चरणमा पुगेको छ । लट–३ मा पर्ने हाइड्रोमेकानिकल अन्तर्गत टर्वाइनका पार्टसहरु आयोजनास्थल पुगि ‘डेभलपिङ’ कार्य भैरहेको आयोजनाले जनाएको छ ।

           आयोजनाको लट–४ अन्र्तगत पर्ने विद्युत प्रसारणको लागि २२०÷१३२ केभीको प्रसारण लाइन भारतीय कम्पनी केइसी इन्टरनेशनल लिमिटेडले सुरु गरेको निर्माण कार्य करिब ७० प्रतिशत सम्पन्न भएको प्रवक्ता डा. न्यौपानेले जानकारी दिए । केइसीले गोंगरखोलादेखि खिम्तीसम्मको ४७ किलोमिटर लाइन प्रशारण गर्ने १ सय २७ ओटा टावरमार्फत ६४ ओटा टावर निर्माण सम्पन्न, थप ३० ओटा टावरको जग खन्ने कार्य सम्पन्न गरिसकेको प्रवक्ता डा. न्यौपानेले जानकारी दिए ।

   लट–१ को ठेकेदारले भूकम्पले क्षतिग्रस्त भएको प्रवेशमार्ग अन्तर्गत काभ्रे भीरमा ३ सय ३० मिटर लम्बाइ हुने सुरुङमार्गको गत असारदेखि सुरु गरी शुक्रबारसम्म २ सय ७२ मिटर खन्ने कार्य सम्पन्न गरेको छ । सुरुङमार्गको निर्माण सम्पन्न भए पछि बाँधस्थलको विभिन्न थप कार्य गर्न सकिने आयोजनाले जनाएको छ ।

दोलखामा ३ जाति संरक्षित, ६ स्वायत्त वडा, २ नगरपालिका सहित ९ पालिकाको अन्तिम सिफारिस

रवीन्द्र गौतम । दोलखा

कात्तिक २१, दोलखा । जिल्लामा क्रियाशिल राजनीतिक दलहरुको सहमतिमा दोलखा जिल्लालाई २ नगरपालिका सहित ९ पालिकाको संरचना रहने गरी स्थानीय तह पुनर्संरचना प्राविधिक सहयोग समिति दोलखाले अन्तिम सिफारिस गरेको छ ।

               जिल्ला विकास समितिको कार्यालयमा कात्तिक २० गते शनिबार बसेको सभासद् एवम् जिल्लामा क्रियाशिल राजनीतिक दल सहितको बैठकमा २ नगरपालिका र ७ गाउँपालिका रहने गरी सहमति भए पछि स्थानीय तह पुनर्संरचना प्राविधिक सहयोग समितिले सोही अनुसार कार्यान्वयन गर्न स्थानीय निकाय पुर्नसंरचना आयोग समक्ष अन्तिम सिफारिस गरेको हो । स्थानीय तह पुर्नसंरचना आयोगले दोलखाको जनसंख्या र क्षेत्रफलको आधारमा ७ देखि ११ पालिका रहने गरी सिफारिस गर्न सुझाव पठाएकोमा ९ ओटा पालिका सिफारिस गरिएको हो ।

                समितिले आयोगमा गरेको अन्तिम सिफारिसअनुसार ३ जातिलाई संरक्षण, ६ ओटा स्वायत्त वडा, २ ओटा नगरपालिका र ७ ओटा गाउँपालिका रहेका छन् । स्थानीय तह पुनर्संरचना प्राविधिक सहयोग समितिले भीमेश्वर र जिरी नगरपालिका तथा विगु, कालिञ्चोक, शैलुङ, मेलुङ, तामाकोशी, वैत्यश्वर र गौरीशंकर गाउँपालिका रहने गरि सिफारिस गरिएको दोलखाका स्थानीय विकास अधिकारी शंकर नेपालले बताए । जिल्लामा २ नगरपालिका र ७ गाउँपालिमा ७५ ओटा वडा सिफारिस गरिएको छ भने थामी, माझी र सुरेललाई संरक्षित जाति प्रस्ताव गर्दै तामाङ, थामी र सुनुवार जातिको लागि ६ ओटा वडालाई स्वायत्त भनि सिफारिस गरिएको छ ।

                विगु गाउँपालिका वडा नं १ र २ लाई तामाङ स्वायत्त, ६ र ८ लाई थामी स्वायत्त त्यसैगरी कालिञ्चोक गाउँपालिका वडा नं. १ लाई पनि थामी स्वायत्त, तामाकोशी गाउँपालिका वडा नं. ७ लाई सुनुवार स्वायत्त वडा सिफारिस गरिएको स्थानीय विकास अधिकारी नेपालले जानकारी दिए । अतिसिमान्तकृत जातिमा सूचीकृत सुरेल जातिलाई पनि गौरीशंकर गाउँपालिका वडा नं. ५ मा संरक्षित जातिको सूचीमा सिफारिस गरिएको छ । स्थानीय तहको केन्द्र राख्ने बिषयमा भने सामान्य बिवाद देखिए पनि सहमतिले नै सिफारिस गरिएको नेपाली कांगे्रस दोलखाका सभापति रुद्रबहादुर खड्काले बताएका छन ।

थप तथा विस्तृत जानकारीको लागिः http://ddcdolakha.gov.np/llrc_dolakha_9_unit/