रवीन्द्र गौतम । दोलखा
बैशाख २७, दोलखा । गौरीशंकर गाउँपालिका वडा नं. २ मा मंगलबार राती भएको झडपमा परि मृत्यु भएका कुलबहादुर तामाङका पिता गोरे तामाङले बुधबार ३९ जना विरुद्ध कर्तव्य ज्यानको मुद्दा दर्ता गराएका छन् । नेकपा एमालेको कार्यकर्ता सहित विभिन्न नारावाजी सहित जिल्ला प्रहरी कार्यालय दोलखा पुगेको मृतकका पिता तामाङले नेकपा माओवादीका विशाल खड्का, ढालबहादुर खड्का, विश्व भनिने गंगाबहादुर कार्की, कृष्णमाया कार्की, विश्वास कार्की, देवी खड्का सहित ३९ जना विरुद्ध कर्तव्य ज्यान मुद्दा दर्ता गराएका हुन् ।
एमाले दोलखाले निकालेको विरोध ¥याली सातदोबाटोबाट शुरु भएर जिल्ला प्रहरी कार्यालय दोलखामा पुगेको थियो । जिल्ला प्रहरी कार्यालयमा पुगेपछि नेकपा एमालेका सभासद पोखरेल र गुरुङ सहितको टोलीले प्रहरी नायव उपरिक्षक रविन कार्की समक्ष हत्यारालाई तत्काल पक्राउ गरी कारवाही गर्न र हत्यामा संलग्नलाई कारवाही गर्न माग गरेको छ ।
अनुसन्धानको लागि बुधबार विहान जँुगु पुगेको दोलखाका प्रहरी नायव उपरिक्षक रविन कार्कीको टोलीले शंकास्पद ८ जनालाई यस अघि नै पक्राउ गरी थुनामा राखेको छ । घट्नामा संलग्न जोसुकै भए पनि हदैसम्मको कारवाही गरिने प्रहरी नायव उपरिक्षक कार्कीले जानकारी दिए ।
¥यालीमा सहभागी भएका मृतकका आफन्तले हत्यारालाई कारवाही गर्न बुधबार नै जिल्ला प्रहरी कार्यालयमा किटानी जाहेरी दिएका छन् । मंगलबार राती ९ बजे दोलखाको गौरीशंकर गाउँपालिका वडा नम्वर २ जुँगुमा माओवादी र एमालेका कार्यकर्ताबीच भएको झडपमा एक जना एमालेका कार्यकर्ताको मृत्यु भएको थियो । भडपमा दुवै पक्षका गरी करिव आधा दर्जन घाईते भएका थिए ।
गौरीशंकर गाउँपालिका वडा नम्वर १ जुँगु दहबारीमा भएको झडपमा ३३ वर्षीय एमाले कार्यकर्ता कुलबहादुर तामाङको ज्यान गएको थियो । मृतक तमाङ केही दिन अगाडि मात्र माओवादी केन्द्र परित्याग गरी एमालेमा प्रवेश गरेका थिए ।
यसैगरी, झडपका क्रममा गौरीशंकर गाउँपालिका वडा नम्वर २ घर भएका एमाले कार्यकर्ता दिलबहादुर बुढाथोकी गम्भिर घाईते भएका थिए । घाईते बुढाथोकीलाई काठमाण्डौ महाराजगञ्जस्थित टिचिङ अस्पतालमा उपचार भईरहेको एमाले दोलखाले जनाएको छ । गम्भिर घाईते बुढाथोकी स्थानीय निलकण्ठेश्वर उच्च माविका शिक्षक पनि हुन् ।
