दोलखामा १ हजार ६ कर्मचारीसँगै निर्वाचन सामग्री पठाइँदै, भोलिसम्म सबै पुगिसक्ने

 रवीन्द्र गौतम । दोलखा

बैशाख २६, दोलखा । जिल्ला निर्वाचन कार्यालय दोलखाले यतिखेर जिल्लाका सवै मतदान केन्द्रहरुमा खटाइने मतदान अधिकृतको समूहलाई निर्वाचनको लागि अत्यावश्यक सामग्री जिम्मा लगाइरहेको छ ।

          यससँगै आ आफ्नो मतदान केन्द्रमा पुग्ने मतदान अधिकृत, सहायक मतदान अधिकृतहरुले निर्वाचन कार्यालय परिसरमा पुगी निर्वाचन सामग्री बुझिरहेका छन् । उनीहरुले बुझ्ने सामग्रीहरुमा मतपत्र बाहेक ६४ प्रकारका सामग्री बुझाइएको जिल्ला निर्वाचन कार्यालय दोलखाका निर्वाचन अधिकारी सच्युतराज उप्रेतीले जानकारी दिनु भयो । निर्वाचन अधिकारी उप्रेतीका अनुसार सियोदेखि, लाहाछाप, स्वस्तिक छाप, मुचुल्का फारम लगायतका सामग्रीहरु पठाइएको छ ।
          निर्वाचन कार्यालयका अनुसार २८ गते सम्म मतदान केन्द्रसम्म पुग्ने गरी सवै मतदान अधिकृतहरुको जिम्मामा अहिले निर्वाचन सामग्री जिम्मा लगाइएको छ । निर्वाचन आयोगको तालिका अनुसार यही बैशाख २८, २९ र ३० गते मतदाताहरुलाई सम्बन्धित मतदान केन्द्रबाट परिचय पत्र वितरण गरिने कार्यक्रम रहेको हुँदा उक्त मिति सम्म फोटो सहितको मतदाता परिचय पत्र समेत पठाइएको छ ।
           दोलखमा ९४ स्थानमा १ सय ७८ वटा मतदान केन्द्र तोकिएको छ । जसमा मतदान अधिकृत, सहायक मतदान अधिकृत, सहायक कर्मचारी र सहयोगी गरी जम्मा १ हजार ६ जना कर्मचारी परिचालन गरिएको छ ।