रवीन्द्र गौतम । दोलखा
भदौ १२, दोलखा । नेपाल विद्युत् प्राधिकरण दोलखा शाखाले विस्तार गरेको विद्युत् प्रसारण लाइनको कारण दोलखामा गम्भिर दुर्घटना हुन सक्ने औंल्याइएको छ ।
प्राधिकरणले सार्वजनिक गरेको आर्थिक वर्ष २०७२÷०७३ को प्रतिवेदनअनुसार कुनै पनि दिन, कुनै पनि क्षण प्रशारण लाईनको कारण गम्भिर दुर्घटना हुन सक्ने औंल्याइएको हो । प्रतिवेदनअनुसार जिल्लाका विभिन्न स्थानहरुमा गाडिएको ४ हजार काठको पोलहरु जिर्ण अवस्थामा रहेको र फेरबदलको लागि कुनै पहल नहुँदा प्राधिकरण दोलखा शााखाले गम्भिर दुर्घटना हुन सक्ने औंल्याइएको हो ।
जिल्लामा ३३ केभी प्रशारण लाइन लामो रहेकोले नियमित विद्युत् आपूर्तीमा समस्या भईरहने, सिंगटी सबस्टेशन चालु हुन नसक्दा ११ केभी प्रशारण लाईन समेत अवरुद्ध हुने गरेको समेत प्राधिकरण दोलखाका लेखा प्रमुख टेकबहादुर श्रेष्ठले जानकारी दिए । जिल्लामा ३३ केभी लाइन १ सय ३१ किलोमिटर, ११ केभी लाइन ३ सय ८३ किलोमिटर र ४००÷२३० भोल्ट लाइन ०५२ किलोमिटर रहेको प्राधिकरण दोलखाको तथ्याङ्कमा उल्लेख गरिएको छ ।
जिल्लामा १० आंशिक र ११ पूर्ण रुपले विद्युतिकरण हुन बाँकी गाविस रहेको र २७ गाविस र २ नगरपालिकामा भने राष्ट्रिय प्रशारण लाइनमार्फत विद्युतिकरण भएको छ भने समुदायस्तरबाट ४ गाविसमा विद्युतिकरण भएको र ति स्थानहरुमा समेत पोलहरु जिर्ण भए पछि कुनै पनि बेला दुर्घटना हुन सक्ने औंल्याइएको हो ।
