रवीन्द्र गौतम । दोलखा
जेठ ३१, दोलखा । जिल्ला मालपोत कार्यालय दोलखाले आफ्नो करिब ५० बर्षे इतिहासमा एकै दिन हालसम्मकै सबैभन्दा बढि ८५ लिखत पारित गरेको छ ।
राष्ट्रिय पुर्ननिर्माण प्राधिकरणले वितरण गर्ने आवास अनुदान प्राप्तिको लागि गरिने सम्झौतामा लालपूर्जालाई आधारभूत मापदण्ड बनाएसँगै विभिन्न ६ प्रकारका लिखत गरी एकैदिन हालसम्मकै सबैभन्दा बढि ८५ लिखत पारित गरेको हो । कार्यालयको तथ्याङ्कअनुसार यस अघि दैनिक करिब १५ ओटा लिखत पारित हुने गरेको थियो ।
गत जेठ २० गते विहिबार अंशबण्डा, बकसपत्र, राजिनामा, दर्ताफारी, अंश बुझेको भरपाई र लाभकर गरी सो संख्याको लिखत पारित भएको जिल्ला मालपोत कार्यालय दोलखाका सूचना अधिकारी अर्जुन पोखरेलले जानकारी दिए । आवास अनुदान लिन लालपूर्जा नचाहिने भएको भए कसैले मतलब नराख्ने जनाउँदै सूचना अधिकारी पोखरेल भने, आपत नपरिकन काम नगर्ने बानीले एकै दिन यो संख्यामा लिखत पारित भएको हो ।
अंशवण्डा ५, बकसपत्र ३६, राजिनामा ३२, दर्ताफारी २ र लाभकर १ ओ लिखत पारित भएको सूचना अधिकारी पोखरेलले जानकारी दिए । लाभकर रु. २ लाख ८६ हजार ८ र अन्य ५ प्रकारको सेवा वापतको रु. ५ लाख ७३ हजार ३ सय ९६ गरी सोही दिनमात्र कूल रु. ८ लाख ५९ हजार ४ सय ४ राजश्व संकलन भएको सूचना अधिकारी पोखरेलले जानकारी दिए ।
राष्ट्रिय पुर्ननिर्माण प्राधिकरणले गत फागुन २९ गतेबाट आवास अनुदान रकम वितरणको लागि सम्झौता सुरु गरेसँगै गत चैतमा ८ सय ५५ र बैशाखमा ७ सय १६ ओटा लिखत पारित भएको कार्यालयको तथ्याङ्क छ । अनुदान प्राप्तिको लागि लालपूर्जा बनाउनेहरुको मालपोत कार्यालयमा ह्वात्तै भिड बढेको हो ।
